STRATAEBURGUM

STRATAEBURGUM

quasi viae militaris oppidum, dici coepit Argentoratum, circa aetatem Gregorii Turonens. qui Histor. Fr. l. 10. c. 19. Ad Argentoratensem urbem, inquit, quam nunc Strateburgum, (potius Strataeburgum) vocant, deductus, etc.

Ibi enim, praeter duas alias vias publicas sive militares, tres erant celeberrimae, una per Alpes Graias Mediolanum ducens: altera Lugdunum Batavorum: tertia Augustam Trevirorum. Hinc urbi nomen, ut videtur, quam proin, praeter ceteros Eutropius in Aureliano, vocat Stratam, Gallis L'estrade, et L'estree. Secundum, inter provinciae Germaniae primae civitates quatuor, locum obtinet. Vulgo Strasburg Germanice, Strasbourg Gallice. Aliter Argentoratum, melius quam Argentina, vide ibi. Sub dispositione viri Spectabilis Comitis Argentoratensis, tractus Argentoratensis, fuit stante nomine Imperiôque Roman. Fuêre et sub dispositione viri illustris Magistri Officiorum, fabricae in Galliis octo, et inter eas prima fabrica Argentoratensis armorum omnium, i. e. spatharum, scutorum, loricarum, sagittarum, ballistarum et clibanorum vel cataphractarum, Hadr. Vales. Notit. Gall.